დელტა
საერთაშორისო ჩემპიონატი „პირადი მცველი 2018“
საქართველოს სახელმწიფო დაცვის სპეციალური სამსახურის მიერ ორგანიზებულ საერთაშორისო ჩემპიონატ „პირად მცველ 2018“-ში სსიპ სსსტც „დელტამ“ ეროვნული წარმოების სამხედრო დანიშნულების პროდუქცია წარმოადგინა.
საქართველოს სახელმწიფო დაცვის სპეციალურმა სამსახურმა განახლებული ინფრასტრუქტურით პირად მცველთა საერთაშორისო ჩემპიონატს- „პირად მცველ 2018“-ს უმასპინძლა. სამსახურის სასწავლო ცენტრში უახლესი სტანდარტების შესაბამისად აღჭურვილი საფეხბურთო მოედანი სამსახურის ხელმძღვანელმა ანზორ ჩუბინიძემ შინაგან საქმეთა მინისტრ, ვიცე-პრემიერ გიორგი გახარიასთან და რეგიონული განვითარებისა და ინსფრასტრუქტურის მინისტრ, ვიცე-პრემიერ მაია ცქიტიშვილთან ერთად გახსნა. ღონისძიებას საქართველოს აღმასრულებელი და საკანონმდებლო ხელისუფლების წევრები, პარტნიორი ქვეყნების დიპლომატიური მისიის წარმომადგენლები და კოლეგა სამსახურების ხელმძღვანელები დაესწრნენ. აღნიშნული ჩემპიონატი ყოველწლიურად ტარდება 2011 წლიდან და მასში მონაწილეობას იღებენ საქართველოს, უკრაინის, ავსტრალიის, სომხეთის, ბელარუსიის რესპუბლიკის, ბულგარეთის, ყირგიზეთის, მოლდოვის, რუმინეთის, აშშს-ს, ყაზახეთის, პოლონეთის, ისრაელის, ხორვატიის, სლოვაკეთის, იორდანიის, ყატარისა და ჩინეთის წარმომადგენლები.
ქართულმა სამხედრო პროდუქციამ დამთვალიერებლი და ოფიციალური წარმომადგენლობების დიდი ყურადღება მიიქცია.
+
სსსტც “დელტა” საერთაშორისო სამხედრო გამოფენაზე EUROSATORY 2018

საქართველოს ისტორიაში პირველად, მსოფლიოს უმსხვილეს სამხედრო გამოფენა EUROSATORY-ზე სამხედრო სამეცნიერო-ტექნიკურ ცენტრ „დელტას“ მიერ წარმოდგენილ იქნა ქართული წარმოების სამხედრო პროდუქცია.

11-15 ივნისს საფრაგეთის დედაქალაქ პარიზში გაიმართა მასშტაბური საერთაშორისო სამხედრო გამოფენა „ევროსატორი 2018, რომელშიც მონაწილეობა მიიღო თავდაცვითი მრეწველობის 1800 ზე მეტმა კომპანიამ მსოფლიოს 63 ქვეყნიდან. გამოფენას 227 ოფიციალური დელეგაცია, ჯამში 58 ათასამდე ვიზიტორი დაესწრო.

სამხედრო სამეცნიერო-ტექნიკურმა ცენტრმა „დელტამ“ გამოფენაზე წარმოადგინა ქართული წარმოების შეიარაღების ნიმუშები,
მათ შორის მოდიფიცირებული ჯავშანტრანსპორტიორი დიდგორი, სამედიცინო საევაკუაციო ჯავშანმანქანა, 60, 82 და 120 მმ ნაღმმტყორცნები, მოდერნიზებული ხელის ყუმბარმტყორცნი, მოდერნიზებული ოპტიკურ-ელექტრონული სენსორული ბლოკით აღჭურვილი ტანკსაწინააღმდეგო ნაღმი რდ-7, ჯავშანჟილეტები MK-1 და MK-2, ჯავშანჩაფხუტები, 12,7 მმ კალიბრის ანტიმატერიული შაშხანა, უხმაურო ნაღმმტყორცნი „მყუდრო“, ორ სიბრტყეში სტაბილიზებული უნიფიცირებული დისტანციური მართვის მოდული და სეტყვის საწინააღმდეგო სარაკეტო დანადგარი.

ქართულმა სამხედრო პროდუქციამ დამთვალიერებლის და ოფიციალური წარმომადგენლობების დიდი ყურადღება მიიქცია. დელტას გენერალურ დირექტორთან უჩა ძოძუაშვილთან ჩაიწერა ინტერვიუები ისეთი წამყვანი სამხედრო-ანალიტიკური სააგენტოების მიერ, როგორიცაა Army Recognition World Defense & Security News და Army Guide.
განსაკუთრებული დაინტერესება გამოიწვია უხმაურო ნაღმმტყორცნმა GNM-60, მოდიფიცირებულმა ჯავშანტრანსპორტიორმა დიდგორმა და სამედიცინო საევაკუაციო ჯავშანმანქანა დიდგორი მედევაკმა.

 

კახეთის რეგიონს სეტყვასაწინააღმდეგო სერვისს „დელტას“ ნაცვლად ბუნებრივ მოვლენებზე აქტიური ზემოქმედების ცენტრი გაუწევს

კახეთის რეგიონს სეტყვასაწინააღმდეგო სერვისს ბუნებრივ მოვლენებზე აქტიური ზემოქმედების ცენტრი გაუწევს. დელტას გენერალური დირექტორის უჩა ძოძუაშვილის განმარტებით, სეტყვის საწინააღმდეგო სისტემამ საცდელ ექსპერიმენტალურ რეჟიმში მუშაობა დაასრულა და ის სამართავად შ.პ.ს. ბუნებრივ მოვლენებზე აქტიური ზემოქმედების ცენტრს გადაეცა. შ.პ.ს. ბუნებრივ მოვლენებზე აქტიური ზემოქმედების ცენტრის 100% წილის მფლობელი კვლავ სახელმწიფო რჩება.
მოგახსენებთ, რომ სსსტც ,,დელტას,, ძირითადი მისია საქართველოს სახელმწიფო ინტერესებიდან და თავდაცვის ეროვნული სტრატეგიიდან გამომდინარეობს. ცენტრის ძირითადი ამოცანა ეროვნული სამხედრო მრეწველობის განვითარების ხელშეწყობაა. თანამედროვე და ინოვაციური სამხედრო ტექნოლოგიების პროექტირება-წარმოებაში დანერგვა, მსოფლიო ტენდენციებს მორგებული საბრძოლო ტექნიკისა და შეიარაღების დაპროექტება, შექმნა და სერიული წარმოება.

3 წლის განმავლობაში სეტყვასაწინააღმდეგო სისტემის ოპერირებისას სსსტც „დელტა“-ს მიერ მიღწეულ იქნა სეტყვის საწინააღმდეგო სამუშაოების 95%-იანი ეფექტურობა, ჩამოყალიბდა როგორც ოპერირების რეგლამენტი, ისე ინსტრუქციების პაკეტი და სისტემა დამოუკიდებელი ერთეულის სახით განაგრძობს ფუნქციონირებას. ბუნებრივ მოვლენებზე აქტიური ზემოქმედების ცენტრი პასუხისმგებელი იქნება სისტემის სხვა რეგიონებში დანერგვასა და გაფართოვებაზე, ასევე სეტყვასაწინააღმდეგო სისტემის სრულფასოვან ფუნქციონირებაზე. გარდა ამისა, სეტყვასაწინააღმდეგო სისტემის მართვის ცენტრის სპეციალისტების მიერ გეოფიზიკის ინსტიტუტისა და ჰიდრომეტეოროლოგიის ინსტიტუტის სამეცნიერო ჯგუფებთან აქტიური თანამშრომლობით განხორციელდება სისტემაში ტექნოლოგიური და მეთოდოლოგიური სიახლეების ათვისება, ხოლო დელტა, თავის მხრივ, განახორციელებს ამ სიახლეების დანერგვის ტექნიკურ მხარდარდაჭერასა და ხელშეწყობას.

სეტყვის საწინააღმდეგო სისტემის შემაჯამებელი ანგარიში

სსსტც „დელტა“-ს ხელმძღვანელობამ კახეთის რეგიონში სეტყვასაშიში სეზონის დასრულებასთან დაკავშირებით 2017 წლის განმავლობაში განხორციელებული სამუშაოების შემაჯამებელი ანგარიში წარადგინა. ღონისძიებას საქართველოს თავდაცვის მინისტრის მოადგილე გიორგი ბუთხუზი დაესწრო. სსსტც „დელტას“ ხელმძღვანელის უჩა ძოძუაშვილის მოხსენება საქართველოს სოფლის მეურნეობის სამინისტროსა და ეკონომიკის სამინისტროს წარმომადგენლებმაც მოისმინეს.

2017 წლის განმავლობაში „დელტას“ სეტყვის საწინააღმდეგო სისტემამ 274 სეტყვასაშიში ზონა ჯამში 3790 ერთეულამდე სეტყვასაწინააღმდეგო რაკეტით დაამუშავა. წლის განმავლობაში ჩატარებული სეტყვის საწინააღმდეგო სამუშაოების ეფექტიანობამ 96,3% შეადგინა, ხოლო ეკონომიკურმა ეფექტიანობამ 25 600 000 ლარი.

სეტყვის საწინააღმდეგო სისტემაზე მუშაობა სსსტც „დელტამ“ 2013 წელს დაიწყო საქართველოს მთავრობის დაკვეთით. სისტემის როგორც ელექტრონული, ასევე მექანიკური კომპონენტების უდიდესი ნაწილი საქართველოში „დელტას“ საწარმოებშია დამზადებული. სისტემის შემადგენლობაში შედის მართვის ცენტრი თბილისში, ცენტრალური მეტეოროლოგიური რადიოლოკატორი სიღნაღთან და 83 ერთეული სტაციონარული სარაკეტო გამშვები მთელი კახეთის მასშტაბით.

25 სექტემბერს ღამით ახმეტაში სეტყვასაშიში პროცესი განეიტრალდა

სსსტც „დელტას“ სეტყვის საწინააღმდეგო სისტემამ 25 სექტემბერს საგარეჯოს, თელავის, ყვარლის, სიღნაღისა და გურჯაანის რაიონებში 9187 კმ2 საერთო ფართობის ფრონტალური ტიპის სეტყვასაშიშ ღრუბლის მასებზე მოახდინა აქტიური ზემოქმედება.

25 სექტემბერს კრიტიკულ ეტაპზე სეტყვის მოსვლის ალბათობამ 100 % შეადგინა, მოსალოდნელი სეტყვის მარცვლების ზომა 40 მმ იყო. 17:53 საათიდან 20:58 საათამდე ზემოაღნიშნული რაიონების თავზე წარმოქმნილი სეტყვასაშიში ღრუბლების მასები ეტაპობრივად დამუშავდა, გასროლი იქნა 200-ზე მეტი სეტყვასაწინააღმდეგო რაკეტა, რის შედეგად ატმოსფერული პროცესების მაქსიმალურად განეიტრალება მოხერხდა. ნალექის დიდი ნაწილი ხუთივე რაიონში უმეტესად ინტენსიური წვიმის სახით ჩამოიცალა. წვრილი სეტყვის მარცვლების მოსვლა აღინიშნა თელავის რაიონში, მეტწილად სროლისთვის აკრძალულ ზონაში მდებარე რამდენიმე სოფელში.

23 სექტემბერს ახმეტაში სეტყვასაშიში პროცესი განეიტრალდა

„დელტა“-ს სეტყვასაწინააღმდეგო სისტემის საშუალებით კახეთის რეგიონში, ახმეტის რაიონში, სამხრეთ-დასავლეთიდან შემოსული სეტყვასაშიში ღრუბლის მასები განეიტრალდა, რისთვისაც 20-მდე სეტყვასაწინააღმდეგო რაკეტა იქნა გასროლილი.

23 სექტემბერს ღამით „დელტა“-ს სეტყვის საწინააღმდეგო სისტემის მართვის ცენტრის მიერ დაფიქსირდა ახმეტის რაიონში შემომავალი ფრონტალური და შიდამასიური სეტყვასაშიში ღრუბლის მასები. სეტყვის მოსვლის ალბათობამ შეადგინა 80 %, მოსალოდნელი სეტყვის მარცვლების ზომამ კი 20 მმ. 22:00 საათიდან 23:00 საათამდე ახმეტის რაიონის თავზე, 300 კვარდატული კილომეტრის ფართობის მქონე ღრუბლის მასები სეტყვასაწინააღმდეგო რაკეტებით ეტაპობრივად დამუშავდა. გასროლილი იქნა 20-მდე ერთეული რაკეტა. ზემოქმედების შედეგად ნალექი ინტენსიური წვიმის სახით ჩამოიშალა.

1 2 3 14